एजेन्सी– विश्व विजेता फ्रान्सका स्टाइकर एन्टोनी ग्रिज्म्यानले बार्सिलोनाबाट खेल्ने सबै प्रतियोगिता जीत्ने लक्ष्य रहेको बताएका छन् ।

शुक्रबारमात्रै बार्सिलोनासँग जोडिएका ग्रिज्म्यानले सामाजिक सञ्जालमा एक भिडियो सार्वजनिक गर्दै क्लबबाट खेल्ने सबै जसो लिग प्रतियोगिता जित्ने लक्ष्य रहेको बताएका हुन् ।

उनले बार्सिलोनामा रहँदा ला—लिगा, कोपा डेल रे र च्याम्पियन्स लिगमा क्लबलाई उपाधि जिताउन चाहेको बताएका छन् । ‘क्लबसँग आवद्ध हुन पाएकोमा अत्यन्तै खुसी, उत्साहित टिमसँग खेल्न आँतुर छु,’ ग्रिज्म्यानले भने, ‘यहाँ मेरा लागि नयाँ चुनौती छ । नयाँ लक्ष्य छ । आशा छ मेरो लक्ष्य र चुनौती पूरा गर्ने अवसर पनि पाउनेछु । लक्ष्य भनेको सबै लिग उपाधि जित्नु हो । जसमा कोपा डेल रे, ला लिगा र च्याम्पियन्स लिग हो ।’

ग्रिज्म्यानले आफ्ना साथी उसमान डेम्बेल र स्यामुअल उमटिटिसँग कुरा गरेको समेत बताएका छन् । उनले लियोनल मेस्सीको साइडबाट खेल्दा पनि छुट्टै आनन्द आउने बताएका छन् ।

आइतबारमात्रै क्लबमा आधिकारिक रुपमा प्रस्तुत भएका उनका लागि १ सय २० मिलियन युरोमा एट्लेटिको मड्रिडबाट बार्सिलोनाले भित्र्याएको हो ।