काठमाडौँ– श्रोत नखुलेको ५ लाख भारतीय र ५ लाख नेपाली रुपैयाँसहित प्रहरीले तीन जनालाई नियन्त्रणमा लिएको छ । सर्लाहीको कविलासी नगरपालिका ८ अगर्वाबाट उनीहरूलाई नियन्त्रणमा लिइएको नम्बर १० गण सर्लाही जनाएको छ ।

 प्रक्राउ पर्नेमा सोही जिल्लाको धनकौल गाँउपालिका ६ घर भई हाल हरिवन नगरपालिका ११ बस्ने ४५ वर्षिया गान्धी साह सोनार, रूपन्देही जिल्लाको साविक फरेना गाविस ६ बस्ने ३५ बर्षिय राजेश बाँनिया र भारत घर भई हाल पर्सा जिल्लाको वीरगञ्ज महानगरपालिका १९ बस्ने १९ वर्षीय अनिल साह रहेका छन् । 

विशेष सूचनाको आधारमा खटिएको सशस्त्र प्रहरीले मलंगवाबाट नवलपुरतर्फ जाँदै गरेको तीन जना सवार प्रदेश नं. २–०३–०१५ प ५९६९ नम्बरको मोटरसाइकल रोकी जाँच गर्दा उनीहरूको साथमा उक्त रुपैयाँ फेला परेको र सो रुपैयाँको श्रोत खुलाउन नसकेपछि नियन्त्रणमा लिइएको हो । 

उनीहरूको साथबाट भारतीय रुपैयाँ ५ सय दरको ९ सय ९६ वटा (४ लाख ९८ हजार), २ हजार दरको एक वटा र नेपाली रुपैयाँ ५० दरको ३२ वटा (१ हजार ६ सय), १ सय दरको ४ सय ८४ वटा (४८ हजार ४ सय), ५ सय दरको ३ सय वटा (१ लाख ५० हजार), १ हजार दरको ३ सय वटा (३ लाख) नोट बरामद भएको हो । 

नियन्त्रणमा लिएका तीनै जनालाई बरामद रुपैयाँसहित आवश्यक कारवाहीको लागि राजश्व अनुसन्धान कार्यालय पथलैया बारामा बुझाइएको छ ।