डोल्पा–अविरल वर्षापछि गएको पहिरोले डोल्पामा ९ जना बेपत्ता भएका छन् । मुड्केचुला गाउँपालिकाको वडा नम्बर १,२,३ मा शनिबार दिउँसो पहिरो जाँदा ९ जना बेपत्ता भएका हुन् । एक जनाको मृत्यु भएको डोल्पा प्रहरीले जनाएको छ । पहिरोमा बेपत्ता भएका ४३ वर्षका धनराज बोहराको शव फेला परेको छ ।

बेपत्ता हुनेमा चार बालबालिका छन् । पानीघट्टमा गएका धनरुपा बोहरा, विचित्र बोहोरा, सारिका बस्नेत, निर्मल बोहोरालगायत बेपत्ता भएका छन् ।

पहिरोले ३ घर बगाएको छ । भानुभक्त बोहरा, जंगबहादुर बोहरा, धर्मराज बोहराको घर बगाएको हो ।
पहिरोका कारण स्थानीय २५ घर जोखिममा परेको गाउँपालिकाका अध्यक्ष दत्तबहादुर शाहीले जानकारी दिए ।

शाहीका अनुसार शनिबार रातिसम्म प्रभावित क्षेत्रमा उद्धार गरिएको र आज (आइतबार) बिहानैदेखि उद्धारमा जुटेको पनि शाहीले बताए ।