सुर्खेत- जिल्ला अस्पताल डोल्पामा दुई वटा एम्बुलेन्स छन्  तर अस्पतालसम्म जान/आउन भने पाउँदैनन् ।

एउटा एम्बुलेन्स एक वर्षदेखि सञ्चालनमा छैन । वारी पारी गर्ने भेरी नदीमा पुल र सडक नहुँदा अर्को एम्वुलेन्सले भेरी नदी पारी पट्टी सम्म मात्र सेवा दिने गर्दछ । झन्डै एक किलोमिटर टाढाको दुरीमा एम्वुलेन्सबाट बिरामी झारेर स्टेचरको माध्यमबाट अस्पतालसम्म पुर्‍याउने गरिन्छ ।

अहिले झोलुङ्गे पुलको सहारामा बिरामी तथा यहाँका सर्वसाधारणहरू वाल्लो दुनैबाट पाल्लो दुनै जाने र आउने गरेका छन् । स्टेचरमा राखेर बिरामी लिनसमेत साँघुरो बाटो भएकाले सधैँ मुस्किल हुने गरेको ठुलिभेरीका नवराज थापाले बताए । अस्पतालबाट बाहिर लिनका लागि सिफारिस गरिएका बिरामीलाई समेत एम्बुलेन्स सम्म पुर्‍याउन समस्या हुँदै आएको छ । कतिपय गर्भवतीलाई अस्पताल लैजाँदा बाटोमै सुत्केरी हुने गरेको डाक्टर सुस्मिता जोसीले बताइन् ।

हाल २५ शय्याको नयाँ अस्पतालको निर्माण कार्य जारी रहेको छ । अस्पताल निर्माणका लागि आवश्यक सामग्री ओसार्न समेत समस्या हुँदै आएको अस्पताल व्यवस्थापन समितिका अध्यक्ष कमल शाहीले सुनाए । ‘बिरामी मात्र होइन, अस्पतालमा आवश्यक उपकरणदेखि अन्य सामग्री लिन समेत समस्या हुँदै आएको छ ।’ उनले भने।

स्वास्थ्य सेवा कार्यालय वल्लो दुनैमा रहेको छ भने अस्पताल पल्लो दुनैमा रहेको छ । कर्मचारी तथा स्वास्थ्यकर्मीलाई जान/आउन मात्र हिँडेर आधा घण्टा लाग्छ । अहिले स्वास्थ्य सेवा कार्यालयको मातहतमा जिल्ला अस्पताल रहेको छ । भेरी करिडोरभित्र दुई वर्षअघि मात्र डोल्पाको सदरमुकाम दुनै सडक सञ्जालसँग जोडिएको थियो ।

ठुलिभेरी, त्रिपुरासुन्दरी नगरपालिकाबाट ल्याइएका बिरामीले सबै भन्दा बढी सास्ती भोग्दै आएका छन् ।  त्यस्तै तिब्ला सडक लिने भन्दै दुनै बजार नै जोखिममा पर्ने गरी पहाड खोलिँदै छ तर अस्पताल जाने सडक निर्माणतर्फ कसैको पनि ध्यान नगएको भन्दै सर्वसाधारणहरूले गुनासो पोखेका छन् ।