इटहरी–अविरल वर्षाका कारण नदीमा पानीको बहाव बढेसँगै सप्तकोशीको कोशी व्यारेजमा पानीको बहाव उच्च भएकोछ ।

पानीको बहाव बढेसँगै उच्च सुरक्षा सतर्कता अपनाइएको छ । बिहान ५ बजे मापन गरिएको पानी २ लाख २५ हजार ९ सय १५ क्युसेक प्रतिसेकेन्ड रहेकोमा ८ बजेको मापनमा बहाब बढेर २ लाख २८ हजार २ सय पुगेको छ ।

पहाडी क्षेत्रमा पानी पर्ने क्रम नरोकिएकाले बहाब अझै बढ्न सक्ने अनुमान गरिएको छ ।

अहिले व्यारेजका ३० ढोका खोलिएको छ । ५६ वटा ढोका रहेको व्यारेजमा भारतीय समन्वयमा पानीको बहाब बढ्न थालेपछि खतराको चिन्ह राखेर ढोका खोल्ने गरिएको छ ।

लगातार पानीको बहाव बढेपछि कोशी प्रभावित क्षेत्रमा मानिसलाई सुरक्षित स्थानमा सर्न स्थानीय प्रशासनले आग्रह गरेको छ ।

बिहान ९ बजे सूचना जारी गर्दै नेपाल बाढी सूचनाले नियमित अनुगमन गर्न आग्रह गरेको छ । सप्तकोशी नदी चतरामा जलसतहले खतरा तह पार गरेपछि सबैलाई सचेत रहन पनि बाढी सूचनाले आग्रह गरेको छ ।

सो क्षेत्रका सर्वसाधारणलाई एसएमएसमार्फत सूचना पठाएको भन्दै उचित व्यवस्थापन र अनुगमनका लागि जुट्न स्थानीय प्रशासनलाई आग्रह गरिएको छ । स्थानिय प्रसासनको समन्वयमा कोशीको तटबन्ध र व्यारेज नियमित अनुगमन गर्नुपर्ने पनि उल्लेख गरेको छ।