काठमाडौं– नेपाल प्रहरीको सीआइबीको डीएसपी भन्दै ठगी गर्ने एक जनालाई प्रहरीले पक्राउ गरेको छ ।

महानगरीय प्रहरी वृत्त थानकोटले सीआइबीको डीएसपी हुँ भन्द‌ै ठगी गर्ने ३८ वर्षीय राजेन्द्र प्रसाद लुइटेललाई पक्राउ गरेको हो । महानगरीय प्रहरी वृत्त थानकोटका प्रमुख डीएसपी कुमार बिक्रम थापाले धादिङ धुनिवेशी नगरपालिका–२ का स्थानीय बासिन्दा लुइटेललाई नियन्त्रणमा लिइएको जानकारी दिए।

लुइटेललाई नगार्जुन नगरपालिका–७ सीतापाइलाबाट नियन्त्रणमा लिई अनुसन्धान शुरु गरिएको छ । थानकोट बृत्त प्रमुख थापाका अनुसार चन्द्रागिरि नगरपालिका–५ बस्ने लुइटेलले चन्द्रागिरि नगरपालिका–३ बस्ने बिजय तामाङलाई आफू सीआइबीमा कार्यरत प्रहरीको डीएसपी भएको र आफूसँग सेक्युरिटी कम्पनी रहेको भन्दै उक्त कम्पनीमा ५ प्रतिशत सेयर हाल्न रु १ लाख ६० माग गरेका थिए ।

उनले तामाङसँग पटक–पटक भेट तथा फोन सम्पर्क गरी रकम माग गरेको र घटनाका पीडितले रु १० हजार दिइसकेको समेत प्रहरी अनुसन्धानबाट खुलेको छ ।

नक्कली डीएसपीको साथबाट एक थान रेडियो सेट, चार्जर एक थान र नगद १० हजार समेत प्रहरी बरामद गरेको छ । राजेन्द्र प्रसाद लुइटेल सशस्त्र प्रहरीको भगौडा प्रहरी रहेको अनुसन्धानबाट खुलेको छ ।

उनलाई नियन्त्रणमा लिई ठगी मुद्दामा म्याद थप गरी अनुसन्धान भइरहेको थानकोट प्रहरीले जनाएको छ ।