काठमाडौं– नेपाल क्रिकेट खेलाडी संघ (सिप्यान) ले क्रिकेट खेलाडीलाई फागुन २१ गते एनसीसीएस—सिप्यान क्रिकेट अवार्ड २०१९ बाट सम्मानित गर्ने भएको छ । बुधबार काठमाडौंमा पत्रकार सम्मेलन गरि आयोजकले अवार्डको घोषणा गरेको हो ।

पहिलो पटक आयोजना हुन लागेको अर्वाड कार्यक्रमलाई नेशनल कलेज फर कम्प्युटर स्टडिज (एनसीसीएस) ले प्रायोजन गरेको छ । वर्ष क्रिकेट खेलाडी पुरुषतर्फ र वर्ष खेलाडी महिलातर्फ गरि दुई तथा वर्ष उदाउँदो क्रिकेट खेलाडी, वर्षको उत्कृष्ट क्षण र लाइफटाइम अचिभमेन्ट अर्वाड गरि ५ विधामा अर्वाड प्रदान गरिनेछ ।

पुरुषतर्फ उत्कृष्ट वर्ष खेलाडीले नगद १ लाख ३२ हजार पुरस्कार राशी प्राप्त गर्नेछन् भने अन्य ४ वटै विधाका पुरस्कृत हुने खेलाडीले समान ६६ हजार प्राप्त गर्नेछन् ।

अर्वाडका लागि योग्य खेलाडी छनोटका लागि छुट्टै प्राविधिक टोली गठन गर्ने सिप्यानले जानकारी दिएको छ । सिप्यानका अध्यक्ष डा.मनिष राज पाण्डेले पहिलो पटक यो पुरस्कार आयोजना गरिएपनि यसले आउने वर्षहरुमा निरन्तरता पाउने बताएका छन् ।