छविराज ओझा र शिल्पा पोखरेल ।

काठमाडौं – निर्माता छविराज ओझाले पत्नी शिल्पा पोखरेलसँग सामान्य झगडा भएको प्रतिक्रिया दिएका छन् । बिहीबार महानगरीय प्रहरी परिसर काठमाडौंमा शिल्पाले दिएको उजुरीपछि झगडा मिलाउन पुगेका ओझाले यस्तो प्रतिक्रिया दिएका हुन् ।

‘हामीबीच सामान्य झगडा मात्र भएको हो, उहाँले उजुरी दर्ता गर्नुभएको रहेछ, यो साधारण कुरा नै हो,’ निर्माता ओझाले भने, ‘प्रहरीमा नआउनुपर्ने उजुरी आएको हो, म पहिलोपटक प्रहरी चौकी आउनुपर्‍यो ।’

उनले घरमा सामान्य झगडा भएको र आफूले कानमा हानेर कानको जाली नफुटेको प्रतिक्रिया दिए । उनले आफ्नी पत्नीलाई कसैले प्रयोग गरेको तर कुनै गुनासो नरहेको पनि बताए ।

शिल्पाले दाइ मान्दै आएका फोटोपत्रकार विकास रौनियारले भने कानको जाली फुटेको सन्दर्भमा कानको उपचार भइरहेको प्रतिक्रिया दिए ।

यता शिल्पा पोखरेलले भने पत्रकारसँग कुनै प्रतिक्रिया दिएकी छैनिन् ।

नायिका तथा मोडल शिल्पा पोखरेल र छविराज ओझाले वि.सं. २०७३ असार २९ गते विवाह गरेका थिए । तर छवि र शिल्पा दुवैले मिडियामा यो खबरलाई लुकाउँदै आएका थिए । उनीहरुले यस्ता समाचार बाहिर आउँदा उनीहरुले खण्डन समेत गर्ने गरेका थिए ।

विकास रौनियारका अनुसार छवि र शिल्पाले ६ महिनाअघि मात्र विवाह दर्ता गराएका थिए ।

यसअघि छविराज ओझाले नायिका रेखा थापासँग बिहे गरेका थिए । रेखासँग बिहे गर्नुअघि छविले हेमा र गिताञ्जली सुनुवारसँग पनि विवाह गरेका थिए । हेमा र रेखाले छविसँग सम्बन्धविच्छेद गरेका थिए भने गिताञ्जली सुनुवारले आत्महत्या गरेकी थिइन् ।

आफ्नो बिहेबारे लुकाउँदै आएका छवि र शिल्पाको सम्बन्ध गसिप बनिरहेका बेला शिल्पाले प्रहरीमा उजुरी दिएपछि निर्माता ओझाका अन्य बिहेबारे पनि चर्चा हुन थालेको छ ।