काठमाडौं- विभिन्न फन्डेबाजी समाचारमा भारतीय मिडिया अगाडि देखिन्छन । देशको नाम जोडिएका विषयमा एकाएक उत्तेजित समाचार प्रकाशन प्रसार गर्ने गरेका मिडियाले एकै छिनमा समाचारलाई विपरीत तिर पनि पुर्‍याउने गरेका छन् । यस्तै भएको छ न्युजिल्यान्डसँगको हारपछि भारतीय सञ्चारमाध्यमको समाचार पनि।

बुधबार बिहानै देखि भारतले विश्वकपको उपाधी उचाल्ने आँकलनसहितका समाचार प्रसारण प्रकाशन गरेका मिडियाले भारत न्युजिल्याण्डसँग पराजित भएपछि खेलाडीको तीव्र आलोचना गरे । सञ्चार माध्यमले नै कप्तान विराट कोहलीलाई ‘भिलेन’ बनाएका छन्।

म्यान्चेस्टरको ओल्ड ट्रार्फोडमा खेलाइएको खेलमा न्युजिल्यान्डसँग भारत १८ रनले पराजित भएपछि भारतीय मिडियाले विराट कोहली, केएल राहुल र रोहित शर्मालाई भिलेन भनेका हुन्।

२४० रनको सामान्य लक्ष्य पनि नाघ्न नसकेको जनाउँदै भारतीय टेलिभिजन एबीपी न्यूजले कप्तान विराट कोहली र ओपनरहरु केएल राहुल र रोहित शर्मालाई भिलेन भनेका हुन्। भारतले ४९.३ ओभरमा अलआउट हुँदै २२३ रन मात्रै बनाउन सक्यो।

रवीन्द्र जडेजाले सबैभन्दा बढी ७० रन बनाएउँदा महेन्द्रसिंह धोनीले ५० रनको योगदान दिए। दुवैले ११६ रनको गतिलो साझेदारी गरे पनि टप अर्डरका ब्याट्म्यानको प्रदर्शन निराशाजनक भएपछि भारत पराजित भएको हो। खेलमा फ्लप भएका कोहली, राहुल र शर्मा तीनैजनाले केबल १–१ रन मात्रै बनाउन सके।