इस्लामावाद- अमेरिका भ्रमण जाँदा पाकिस्तानी प्रधानमन्त्री इमरान खानले आलिशान होटलमा नभई आफ्नै राजदूतको कोठामा बास बस्ने भएका छन् ।

सरकारी खर्च जोगाउनका लागि प्रधानमन्त्री खानले यस्तो निर्णय गरेका हुन् । उनी आलिशान होटलमा नभई अमेरिकाको राजधानी वाशिंटन डीसीस्थित प्रमुख कूटनीतिक क्षेत्रमा रहेको पाकिस्तानी राजदूत असद मजिदको आवासमा बास बस्नेछन् ।

प्रधानमन्त्री खान आगामी जुलाई २१ बाट तीन दिनका लागि अमेरिका भ्रमणमा निस्कदै छन् । कुनै पनि मुलुकका राष्ट्र प्रमुख तथा सरकार प्रमुखले अमेरिका भ्रमण गर्दा त्यहाँको गुप्तचर निकायले उनीहरुको सुरक्षाको प्रबन्ध गर्ने व्यवस्था छ ।

विदेशी पाहुनाको भ्रमणले राजधानीमा बसोबास गर्ने आम जनताको दैनिकीमा प्रभाव नपरोस् भन्नाका लागि गुप्तचर निकायले विशेष प्रबन्ध गर्ने गरेको छ ।

पाकिस्तानी प्रधानमन्त्रीको पछिल्लो निर्णयबाट अमेरिकी गुप्तचर निकाय भने असन्तुष्ट रहेको पाकिस्तानी सञ्चारमाध्यमले जनाएका छन् ।