काठमाडौँ– चिनियाँ कम्पनीका कारण श्रीलंकाको मत्स्य उद्योग प्रभावित बन्दै गएको पाइएको छ । श्रीलंकाबाट प्रकाशित हुने कोलम्बो गजेटले श्रीलंकाली समुद्रबाट सिअर्चिन र समुद्री काँक्रो निर्यात गर्ने गुइ लान नामक चिनियाँ कम्पनीका कारण मत्स्य उद्योग र माछा मारेर जीवन निर्वाह गर्दै आएका माझीहरु प्रभावित भएको जनाएको हो ।

श्रीलंकाको पुनेरिनस्थित क्वथारिमुनाई क्षेत्रमा उक्त कम्पनीको गतिविधिका कारण माछा मारेर जीवन निर्वाह गर्दै आएका ३२ हजार माझीको परिवार प्रभावित भएको जनाइएको छ ।

माझीहरुले परम्परागत रुपमा माछा मार्ने ठूलो समुद्री क्षेत्रलाई उक्त कम्पनीले समुद्री काँक्रोको उत्पादनका लागि हडपेको पसाइयुर माझी महासंघका प्रमुख पी मथानले जानकारी दिए ।

यसबाहेक आफ्नो व्यवसाय सञ्चालन गर्न गुई लान कम्पनीले मुलुकको राष्ट्रिय कृषि विकास प्राधिकरणको अनुमति पनि नलिएको कोलम्बो गजेटले उल्लेख गरेको छ ।