काठमाडौं- ब्राजिल तथा पेरीस सेन्ट जर्मेन (पीएसजी) का स्टार खेलाडी नेयमारलाई क्लबले कारबाही गरेको छ । उनी जुलाई ८ देखि शुरु भएको क्लबको अभ्यासमा सहभागी नभएपछि उनलाई सचेत गर्न पीएसजीले चेतावनी स्वरुप कारबाही गरेको हो ।

सोमबार क्लबले यो सिजनको अभ्यास खेल शुरु गर्दा बिना कुनै सूचना अभ्यासमा सहभागी नभएपछि पीएसजीले उनलाई कारबाही गरेको हो ।

पछिल्लो समय नेयमारलाई लिएर अन्तर्राष्ट्रिय सञ्चारमाध्यमहरुमा विभिन्न खाले समाचारहरु आइरहँदा क्लबले उनीमाथि देखाएको आक्रोशले नेयमार र क्लबबीचको सम्बन्धलाई चित्रण गरेको फुटबल पण्डितहरुको आँकलन छ ।

यो बीचमा सरुवा बजार चलिरहँदा नेयमार पूर्व क्लब बार्सिलोना फर्किन तयार रहेको हल्ला समेत चलिरहेको छ ।