काठमाडौँ : नेपाललाई अन्तर्राष्ट्रियस्तरमा चिनाउन सन्दीप लामिछानेको सबैभन्दा ठूलो भुमिका छ । क्रिकेटका माध्यमबाट उनले नेपाल जस्तो सानो र सुन्दर देशलाई विश्वभर चिनाएका थिए । आइपीएलबाट चिनिएका सन्दीपले अष्ट्रेलिया, वेष्ट इण्डिज, दक्षिण अफ्रिका, श्रीलंका, बंगलादेश लगायतका धेरै देशमा क्रिकेट खेलेका छन् ।

उनले क्रिकेट खेल्दा हरेकपटक नेपालको नाम उच्चारण हुने गथ्र्यो । नेपालका सबैभन्दा सफल नभएपनि अन्तर्राष्ट्रिस्तरमा सबैभन्दा धेरै चिनिएका क्रिकेटर, सन्दीप हुन् । सानै उमेरमा लोभलाग्दो क्रेज पाएका सन्दीप लामिछाने पछिल्लो समय भने गम्भीर मुद्दा खेप्न बाध्य भए ।

उनले एक किशोरीलाई बलात्कार गरेको आरोपमा बलात्कार मुद्दा खेपिरहेका छन् । उमेर नपुगकी किशोरीलाई बलात्कार गरेको आरोपमा सन्दीप जेल चलान भएका थिए । तर पाटन उच्च अदालतको आदेशले २० लाख रुपैयाँ धरौटी बुझाएर सन्दीप लामिछाने रिहा भएका छन् ।

उनीमाथि बलात्कार जस्तो गम्भीर आरोप लागेको छ । यो मुद्दामा उनले सफाई पाएका छैनन् । आरोप प्रमाणित नभएपनि उनले जेल जीवन बिताइसकेका छन् । सन्दीप जस्तो अन्तर्राष्ट्रियस्तरको व्यक्तिले सामान्य लाग्ने तर गम्भीर मुद्दामा फस्दा उनीसँगै नेपाली क्रिकेट पनि आलोचित बन्यो ।

तर त्यो आलोचना यतिबेला यति धेरै बढेको छ कि यसले हरेकको मुखबाट नेपाली क्रिकेट टिम सञ्चालकमाथि अनेकौ प्रश्न उठेको छन् । यतिबेला सन्दीप क्रिकेट एशोसिएसन अफ नेपाल क्यानको निर्णयका कारण राष्ट्रिय टिममा समेटिएका छन् ।

त्यसअघि उनलाई क्यानले निलम्बन फुकुवा गरेको थियो । लिनम्बन फुकुवा लगत्तै उनलाई राष्ट्रिय टिममा प्रशिक्षणका लागि बोलाउनु दुःखद रहेको धेरैको विश्लेषण छ । जबकी उच्च अदालतले उनलाई काठमाडौँ उपत्यका छाड्न नपाइने आदेश गरेको छ ।

विदेश जान उनलाई प्रतिबन्ध छ । क्रिकेट खेल्ने विषयमा एक शब्दमा पनि फैसलामा लेखिएको छैन । यसबारे जिल्ला प्रशासन र न्यायका जानकारसँग कुनै परामर्श नगरी सन्दीपलाई राष्ट्रिय टिममा राखिएको भन्दै माइतीघरमा समेत प्रदर्शन भइसकेको छ ।

यस्तो अवस्थामा राष्ट्रिय क्रिकेट टिममा उनलाई बोलाइनु दुःखद हो । सन्दीप जस्तो अन्तर्राष्ट्रिय क्रिकेटरले पनि नैतिकताको ख्याल नगरी टिममा जानु धेरैका लागि अचम्मित छ । उनीविरुद्ध नाराबाजी हुनु, क्यानको निर्णयविरुद्ध प्रदर्शन हुनु, सन्दीपलाई पटक पटक बलात्कार अभियुक्त भनेर करार गर्नुले नेपाली क्रिकेट विवादकै घेरामा छ ।

त्यसमाथि नेपाली क्रिकेट टिम सञ्चालन तथा व्यवस्थापन गर्न पटक पटक चुकेको क्यान सन्दीपको विषयमा निर्णय गर्न हतारिनुले पनि धेरै प्रश्न उठाएको छ । यसले राष्ट्रिय तथा अन्तर्राष्ट्रिय क्षेत्रमा पनि नेपाली क्रिकेटको आलोचना बढाएको छ । सन्दीप टिममा फर्किनु राम्रो हो, तर स्पष्ट आदेश र मुद्दा नटुंगिकनै उनलाई टिममा बोलाइनु र निलम्बन फुकुवा गर्नु धेरै दुःखद हो ।

यसले भविष्यमा पनि नेपाली राष्ट्रिय क्रिकेट टिम र टिमका सदस्यलाई हेर्ने नजर धेरै हदसम्म फेरिनेमा आशंका छ ।