मुम्बई – बलिउड अभिनेता सञ्जीव कुमारको फिल्मी करिअर त शानदार नै छ । उनले फिल्मको पर्दामा कैयन् भूमिका निभाए । तर, वास्तविकतामा उनी एक सुखबाट सधैँका लागि वञ्चित रहे । उनले घरजम बसाउने सुख कहिल्यै पाउन सकेनन् ।

यसको कारण थियो, अन्धविश्वास ।

खासमा उनको परिवारमा यस्तो घटना भएको थियो कि, छोरा १० वर्षको हुँदा पिताको मृत्यु भएको थियो । सञ्जीव कुमारका हजुरबुबा, बुबा र भाइका साथ यस्तो भएको थियो । यही कारणले सञ्जीव कुमारले बिहे नगर्ने फैसला गरेका थिए ।

बलिउडका यी ‘ठाकुर’ले बिहे त गरेनन् तर भाइका छोरालाई आफ्नो छोरा बनाए । आफूले अपनाएको छोरा जब १० वर्षका भए, सञ्जीव कुमारले यो संसारबाट अलविदा गरे । उनले ४७ वर्षकै उमेरमा यो संसारबाट विदा लिएका थिए ।

पहिलो हृदयघातपछि उनले अमेरिकामा पुगेर सर्जरी पनि गराएका थिए । तर उनको हालतमा खासै सुधार आएन । उनका कतिपय फिल्म मृत्युपछि रिलिज भएका थिए । सञ्जीव कुमारको अन्तिम फिल्म ‘प्रोफेसर की पडोसन’ थियो । यो फिल्म सन् १९९३ मा रिलिज भएको थियो ।