काठमाडौं – गृहमन्त्री रामबहादुर थापा बादलले विप्लव समूहका नेता कुमार पौडेलको मृत्यु दोहोरो भिडन्तका क्रममा भएको बताएका छन् । उनले राज्य व्यवस्था तथा समितिको निर्देशनमा बनेको छानबिन समितिले त्यही देखाएको भन्दै पौडेल दोहोरो भिडन्तमा मारिएको दाबी गरे ।

मंगलबार संसदमा नेपाली काङ्ग्रेसले कुमार पौडेललाई नियन्त्रणमा लिएर हत्या गरेको विषयलाई लिएर सरकारको धारणा मागेको थियो ।

त्यसको जवाफमा गृहमन्त्री बादलले गस्तीमा रहेका प्रहरी टोली र विप्लव समूहका कार्यकर्ताको जम्काभेट हुँदा भिडन्त भएको दाबी गरे ।

साथै उनले कुमार पौडेलसँगै रहेका सहकर्मीले फाइरिङ गर्दै भागेपछि कुमार पौडेलले पनि फायरिङ गरेको दाबी गरे । विप्लव समूहका नेता पौडेलले मिस फायर गरेको र प्रहरीले जवाफी कारबाही गर्दा मृत्यु भएको उनको दाबी थियो ।