काठमाडौँ- विश्व बैंकले चीनको अर्थतन्त्र अपेक्षाअनुसार वृद्धि नहुने पूर्वानुमान गरेको छ । विश्व बैंकले सार्वजनिक गरेको प्रतिवेदनमा सन् २०२२ मा चीनको अर्थतन्त्र २ दशमलब ७ प्रतिशतले मात्र वृद्धि भएको विश्व बैंकको प्रारम्भीक अनुमान छ ।

चीनले सन् २०२२ मा ८ दशमलब १ प्रतिशतको आर्थिक वृद्धि हुने अपेक्षा गरेको थियो । त्यसैगरी सन् २०२३ मा पनि चीनको अर्थतन्त्र केबल ४ दशमलब ३ प्रतिशतले वृद्धि हुने विश्व बैंकको अनुमान छ ।

चीनको उत्पादन क्षेत्र कमजोर बन्दै गएकाले अर्थतन्त्रमा दबाब उत्पन्न भएको बताइएको छ । यसअघि चीनले लागू गरेको कठोर शून्य कोभिड नीतिका कारण उपभोक्ताको खर्चमा कटौती भएको थियो । यसबाट पनि चीनको अर्थतन्त्रमा नकारात्मक प्रभाव पर्ने जनाइएको छ ।

लगानी, कम खर्चमा उत्पादन एवम् निर्यातलगायतका कारण हालसम्म उच्च रहँदै आएको चीनको आर्थिक वृद्धि उच्चतम विन्दुमा पुगिसकेको भन्दै विश्व बैंकले यसबाट आर्थिक, सामाजिक एवम् वातावरणीय असन्तुलन उत्पन्न भएको उल्लेख गरेको छ ।

यसलाई सन्तुलनमा ल्याउनका लागि चीनले आफ्नो अर्थतन्त्रको स्वरुपलाई उत्पादनबाट सेवा एवम् लगानीबाट उपभोगमा परिमार्जन गर्नुपर्ने जनाएको छ ।

अमेरिकाबाट प्रकाशित हुने फाइनान्सियल पोस्टका अनुसार चीनमा घट्दो जन्मदर र यससँगै श्रम बजार पनि घट्दै गएको छ । सोही कारण चीनको उत्पादकत्वमा पनि नकारात्मक प्रभाव परिरहेको जनाइएको छ ।