काठमाडौँ– भारतले चीनसँग जोडिएको सीमा क्षेत्र वास्तविक नियन्त्रण रेखा एलएसीमा पूर्वाधार निर्माणको कामलाई तीव्रता दिएको छ ।

भारत सरकारले एलएसी र खासगरी पूर्वोत्तर राज्य अरुणाचलमा चीनसँग सीमा जोडिएका क्षेत्रमा पूर्वाधार निर्माणको कामलाई तीव्र पारेको अरुणाचल अब्जरभर अनलाइनले उल्लेख गरेको छ ।

सरकारी तथ्यांकअनुसार एलएसीमा भारतीय पक्षबाट हालसम्म २ हजार किलोमिटर सडक निर्माण गरिएको छ । आगामी मार्च महिनामा अरु ६० वटा सडक बन्ने अपेक्षा गरिएको अरुणाचल अब्जरभरले उल्लेख गरेको छ । यसका लागि भारत सरकारले १५ हजार करोड भारतीय रुपैयाँ खर्च गरेको छ ।

सन् १९६२ मा चीनसँगको युद्धमा अरुणाचल प्रदेशमा सडक पूर्वाधारको कमी भएकै कारण भारतले पराजयको सामना गर्नुपरेको थियो । भारतको अरुणाचल प्रदेश र चीनबीच १ हजार १ सय २६ किलोमिटरको सीमा रहेको छ ।

चीनले अरुणाचल प्रदेशमा सैनिक अतिक्रमणलाई थप विस्तार गर्ने चिन्तामाझ भारतले सो क्षेत्रमा पूर्वाधार निर्माणको कार्यलाई तीव्र पारेको हो ।

गत डिसेम्बर ९ मा अरुणाचलको तवाङ क्षेत्रको याङ्त्सेमा दुई मुलुकका सुरक्षाकर्मीबीच झडप भएको थियो । चीनले अरुणाचल प्रदेश दक्षिण तिब्बतमा पर्ने भन्दै लामो समयदेखि सार्वभौमिकता दाबी गर्दै आएको छ ।

गत जनवरी ३ मा अरुणाचलको बोलेङ सहर पुगेर भारतीय रक्षामन्त्री राजनाथ सिंहले ७ सय २४ करोड भारतीय रुपैयाँ बराबरका २८ पूर्वाधार परियोजनाको उद्घाटन गरेका थिए ।