एजेन्सी – आयोजक ब्राजिलले कोपा अमेरिकाको उपाधि जितेको छ ।

आइतबार घरेलु मैदानमा भएको फाइनल खेलमा पेरुलाई ३–१ ले पराजित गर्दै ब्राजिलले लामो समयपछि कोपाको उपाधि जितेको हो । ब्राजिल नवौं पटक कोपाको च्याम्पियन बनेको हो ।

प्रतियोगिता अवधिभर अपराजित रहेको ब्राजिलले यसक्रममा १ गोल मात्र खायो ।

फाइनलमा पाउलो गुरेरोले पेनाल्टीमा गरेको गोल ब्राजिलका गोलरक्षक एलिसन बेकरले खाएको एकमात्र गोल थियो । यससँगै ब्राजिलले प्रतियोगिताको व्यक्तिगत विधातर्फको पुरस्कारमा पनि वर्चस्व जमाएको छ ।

कोपाको उत्कृष्ट खेलाडी, उत्कृष्ट गोलरक्षक लगायत ४ वटा पुरस्कारमा ब्राजिलले कब्जा जमाएको छ ।

ब्राजिलका ड्यानी आल्भेस उत्कृष्ट खेलाडी बनेका छन् भने गोल्डेन ग्लोभ्स अर्थात उत्कृष्ट गोलरक्षक पनि ब्राजिलका एलिसन बेकरले हात पारेका छन् । त्यस्तै उत्कृष्ट युवा खेलाडी  एभरटन सोआएसले हात पार्दा सर्वाधिक गोलकर्ताको उपाधि पनि सोआरेसले हात पारेका छन् उनले पेरुका पाउलो गुरेरोसँग पुरस्कार बाँडेका छन् । प्रतियोगितामा उनीहरुले समान ३ गोल गरेका थिए ।