एजेन्सी– एक चर्चित नायिकाले विवाह नै नगरी आमा बनेपछि उनको भारतभर चर्चा छ । उनले सन्तानको रुपमा छोरीलाई जन्म दिएकी हुन् । उनी आमा बनेको झण्डै तीन वर्ष पुग्न लागेपनि विबाह अगावै सन्तान जन्माएको विषय भने हालै सार्वजनिक भएको हो ।

अविवाहित नायिकाले आफूसँग तीन वर्षकी छोरी रहेको बताएपछि धेरैलाई अचम्म लागेको छ । ती नायिका हुनु, माही गिल । आफू अविवाहित रहेरै छोरीलाई जन्म दिएको र अब भने विवाह गर्ने सोच बनाएको उनले बताएकी छन् ।

नवभारत टाइम्समा हालै प्रकाशित उनको अन्तर्वार्तामा बच्चा आफ्ना प्रेमीको भएको र उनी व्यापारका सिलसिलामा गोवामा रहने गरेको बताएकी छन् ।

प्रेमी गोवामा भएकैले आफू बारम्बार गोवा आउजाउ गर्ने गरेको उनले सो अन्तर्वार्तामा प्रष्ट पारेकी छिन् । छोरी र प्रेमीप्रति आफूले गर्व गर्ने बताइन् ।

एक प्रश्नको जवाफमा उनले भनेकी छन्, ‘मेरी छोरी आगामी अगष्टमा तीन वर्षकी हुँदैछिन् । यसबारे मलाई कसैले सोधेन र बताइनँ पनि । अहिले सोधियो बताएँ ।’ विवाह नगरी सन्तान जन्माउनु सामान्य भएको उनको भनाइ छ । ‘विवाह नै नगरी सन्तान जन्माउनु स्वभाविक हो’, उनले भनेकी छन्, ‘मलाई यसमा कुनै समस्या लागिरहेको छैन । यो हरेक मानिसको निजी जीवन हुन्छ । यो पनि मेरो निजी जीवनको सवाल हो ।’