काठमाडौँ– आफ्नो समूहबारे दुष्प्रचार गरेको भन्दै अफगानिस्तानमा शासन चलाइरहेको तालिबानले विदेशबाट सञ्चालित अफगान सञ्चार माध्यममाथि कडाई गर्ने भएको छ । तालिबानको सूचना तथा संस्कृति मन्त्रालयका निर्देशक अब्दुल हक हेमादले विदेशमा रही आफ्नो समूहविरुद्ध दुष्प्रचार गर्ने मिडियामाथि कारवाही गरिने जनाएका हुन् ।

‘यस्ता मिडियालाई के गर्ने भन्ने निर्णय गरिएको छ । यो विषय अदालतमा विचाराधीन रहेकाले छोटो समयमा नै यसबारे घोषणा हुनेछ ।’ हेमादलाई उद्धृत गर्दै अफगानिस्तान इन्टरनेशनल अनलाइनले उल्लेख गरेको छ ।

उनले अफगानिस्तानको कानूनअनुसार मुलुकको मिडियामा काम गर्ने व्यक्ति मुलुकभित्रै रहनुपर्ने व्यवस्था रहेकोमा समेत जोड दिए । ‘विदेशबाट मिडिया सञ्चालन गर्न र दुष्प्रचारलाई बढावा दिन कुनै कानूनले पनि दिँदैन ।’ उनले भने ।

उनका अनुसार अफगानिस्तानमा १६५ वटा रेडियो र ५५ वटा टेलिभिजन स्टेशन रहेका छन् । सन् २०२१ को अगस्ट महिनामा तालिबानले सत्ता कब्जा गरेयतामात्रै अफगानिस्तानमा २४ वटा नयाँ मिडिया स्थापना भएको समेत उनको दाबी छ ।