काबुल- अफगानिस्तानमा इस्लामिक लडाकु समूह तालिबानले गराएको कार बम आक्रमणमा १२ जना मारिएका छन् । अफगानिस्तानको गजनी प्रान्तमा भएको विष्फोटमा अरु १७९ जना घाइते भएका छन् ।

गजनी प्रान्तको राजधानी शहरस्थित राष्ट्रिय सुरक्षा निर्देशनालय अगाडी कार बम आक्रमण भएको हो । अधिकारीका अनुसार आक्रमणमा ज्यान गुमाउनेमा ८ सुरक्षा अधिकारी तथा ४ सर्वसाधारण छन् ।

तालिबानका प्रवक्ता जबिहउल्लाह मुजाहिदले आक्रमणमा आफ्नो समूहको संलग्नता रहेको पुष्टि गर्दै आक्रमणमा दर्जनौं सुरक्षाकर्मी मारिएको तथा घाइते भएको दाबी गरेका छन् ।

आक्रमण आत्मघाती प्रकृतिकोजस्तो देखिएको र यसबारे अनुसन्धान अघि बढाइएको अफगान सुरक्षा अधिकारीले जनाएका छन् ।

पछिल्लो केही समययता तालिबानले अफगानिस्तानमा सैनिक तथा सार्वजनिक निशानालाई लक्षित गरी दैनिकजसो आक्रमण गर्दै आएको छ ।