काठमाडौं– शनिबार अपराह्नबाट परेको अविरल वर्षाले काठमाडौंमा नदी तथा खोलाहरुमा पानीको सतह बढ्यो । मध्यरातसम्ममा अधिकांश खोलाहरु बाग्मती, विष्णुमति, धोविखोला, टुकुचा लगायतमा पानीको सतह निकै माथि पुगेको थियो ।

सधैँ फोहर थुप्रिने, पानी समेत अत्यन्त फोहोर भएका यी खोलाहरुमा वर्षासँगैको बाढीले पस्दा खोलाको सतह बढेको हो । कतिपय क्षेत्रमा खोला भरिएर आसपासका क्षेत्र समेत डुबानमा परे ।

जल तथा मौसम विभागले एक सूचना जारी गर्दै जलसतह बढ्दो क्रममा रहेकाले सर्तक हुन आह्वान गरेको थियो । विभागले नयाँ वसपार्क क्षेत्रदेखि टेकु दोभानसम्मको तटीय होचा स्थानमा उच्च सतर्कता अपनाउन अनुरोध गरेको थियो ।

शेषमती खोलामा आएको बाढीका कारण खोला आसपासका शरणार्थी बस्ती डुबानमा परेका हुन् । घर तथा टहरामा खोलाको बाढी पसेपछि उनीहरुको विचल्ली भएको हो ।