काठमाडौँ– क्याम्ब्रिज विश्वविद्यालयमा अध्ययन गर्ने एक जना भारतीय विद्यार्थीले संस्कृत भाषाको २५ सय वर्ष पुरानो व्याकरणसम्बन्धी समस्या हल गरेका छन् । क्याम्ब्रिज विश्वविद्यालयमा विद्यावारिधि अध्ययन गरिरहेका ऋषि राजपोपटले संस्कृत भाषाको व्याकरणसम्बन्धी समस्या हल गरेका हुन् ।

२५ सय वर्षअघि संस्कृत भाषाका विद्वान मानिने पाणिनीले अघि सारेको व्याकरणसम्बन्धी सुत्र हल गर्न धेरै प्रयास भएपनि कसैले सकेका थिएनन् । यद्यपि संस्कृत भाषामा विद्यावारिधि गरिरहेका राजपोपटले भने ९ महिना लगाएर समस्याको हल निकालेको बीबीसीले जनाएको छ ।
उनले यस समस्याको हल निकाल्न घण्टौँसम्म पुस्तकालयमा बिताएको पनि उल्लेख गरेका छन् । पाणिनीको अष्टाध्यायी व्याकरणले संस्कृत भाषामा ‘अल्गोरिदम’ जस्तै काम गर्ने बताइन्छ ।

यद्यपि बीबीसीका अनुसार कुनै एक वाक्यमा पाणिनीका दुई वा बढी अष्टाध्यायी व्याकरण प्रयोग गरिएको खण्डमा गलत अर्थ आउने गरेको थियो ।

यद्यपि उनले परम्परागत व्याख्या अस्वीकार गर्दै नयाँ सुत्र प्रयोग गरेको बीबीसीले उल्लेख गरेको छ । उनले आफ्नो खोजबाट संस्कृत भाषाका विद्यार्थीहरुलाई सहज हुने विश्वास गरेका छन् ।