काठमाडौँ- एक अन्तर्राष्ट्रिय संस्थाले विश्वका आधा लोकतान्त्रिक देशहरूले अहिले ‘लोकतन्त्रको क्षय’ अनुभव गरिरहेको दाबी गरेको छ ।

स्विडेनको राजधानी स्टकहोल्ममा आधारित आइडिया नामक संस्थाले सार्वजनिक गरेको प्रतिवेदनमा कोभिड–१९ महामारी, मौसम परिवर्तन, गिर्दो आर्थिक वृद्धि र युक्रेनमा जारी रुसी आक्रमणका कारण लोकतन्त्रको अवस्था झनै बिग्रिएको दाबी गरिएको छ ।

अभिव्यक्ति स्वतन्त्रतामा अवरोध, निर्वाचनको वैधानिकतामा अविश्वासजस्ता कारणले लोकतान्त्रिक संस्थाहरुको क्षय हुँदै गएको उक्त प्रतिवेदनमा उल्लेख छ । प्रतिवेदनमा अधिनायकवादी सरकारहरु झन् दमनकारी हुँदै गएको समेत उल्लेख गरिएको छ ।

अन्तर्राष्ट्रिय समाचार संस्था रोयटर्सका अनुसार यस संस्थाले सार्वजनिक गरेको तथ्यांकमा अभिव्यक्ति स्वतन्त्रता, व्यक्तिगत आत्मसम्मान, सुरक्षाजस्ता १ सयवटा चरलालाई समावेश गरिएको थियो ।