काठमाडौँ : कतार विश्वकप फूटबलमा इरानले वेल्सलाई हराएको छ । शुक्रबार साँझ अहमद बिन अली रंगशालामा भएको समूह बी अन्तर्गतको खेलमा इरानले १० खेलाडीमा सीमित वेल्सलाई अन्तिम अतिरिक्त समयमा तीन मिनेटमा दुई गोल गर्दै २–० गोलले पराजित गरेको हो ।

निर्धारित ९० मिनेटको खेल गोलरहित बराबरीमा सकिएको थियो । थप गरिएको झण्डै १२ मिनेटको समयमा इरानले नाटकीय फूटबल खेल्यो । त्यसमा पनि उसले तीन मिनेटमा दुई गोल गरेको हो ।

इरानलाई जिताउन जित दिलाउन रोजवेह चेस्मी र रामिन रेजाइनले गोल गरे । इरानले ​चेस्मी र रामिज दुवैले इरानका लागि दोस्रो हाफको इन्जुरी समयमा गोल गरेका हुन् ।

चेस्मीले ९८ र रेजाइनले १०१ औँ मिनेटमा गोल गरेका हुन् । त्यसअघि ८६ औँ मिनेटमा वेल्सका गोलरक्षक वायन हेनेसीले रातो कार्ड खाएर मैदानबाट बाहिरिएका थिए । जसकारण वेल्स १० खेलाडीमा सीमित भयो । तर उसले निर्धारित ९० मिनेट र अतिरिक्त ७ मिनेट खेल नियन्त्रणमै राखेको थियो । तर अन्तिम ५ मिनेट सम्हालिन नसक्दा वेल्स पराजित भयो ।

इरानको यो पहिलो जित हो । यसअघि इरान इंग्ल्याण्डसँग ६–२ गोल अन्तरले पराजित भएको थियो भने वेल्सले अमेरिकासँग बराबरी खेलेको थियो । आजको हारपछि वेल्स समूह चरणबाटै बाहिरिने सम्भावना बढेको छ ।