काठमाडौँ : पाँच वर्ष पहिले काठमाडौँमा मेयरको चुनाव लडेर चर्चामा रहेकी रञ्जु दर्शना (न्यौपाने) अहिले गुमनाम भएकी छन् । काठमाडौँ ५ बाट प्रतिनिधिसभा चुनाव लडेकी उनी पराजित मात्रै भएकी छैनन्, जमानत नै जफत भएको छ ।

विवेकशील नेपाली पार्टीबाट उदाएकी रन्जु दर्शनाले २०७३ सालमा काठमाडौँ महानगरको मेयरमा चुनाव लड्दा २३ हजार मत ल्याएकी थिइन् । तर अहिले काठमाडौँ ५ बाट चुनाव लड्दा उनले मात्रै ६०० भोट ल्याएकी छन् । चुनावमा भोट ल्याउने नम्बरमा उनी नवौँ भइन् । यो परिणामले उनी चर्चित होइन कि गुमना भएर पछाडि परेकी हुन् ।

प्रदीप पौडेल र इश्वर पोखरेलसँग चुनाव लडेकी उनी यसबीचमा कतै चर्चामा रहिनन् । उम्मेद्वारी दिएपछि खासै प्रचार गर्न नसकेकी उनी पराजित हुँदा जमानत जफत भएपछि मात्रै मिडियामा छाइन् । काठमाडौँ ५ मा खसेकोमध्ये ४४ हजार २४९ मत सदर थियो । तर उनले सदर मतको १० प्रतिशत ल्याउनुपर्नेमा जम्मा १.४ प्रतिशत मत ल्याइन् । यसले उनको १० हजार रुपैयाँ जमानत जफत भएको छ ।

यो क्षेत्रबाट प्रदीप पौडेल विजयी भएका छन् । यसपटक पराजित भएकी रञ्जु पछिल्लो समय विवेकशील साझा पार्टीबाट राजीनामा दिएर बाहिरिएकी थिइन् । सडक प्रदर्शनमा समेत नदेखिने रञ्जु विस्तारै गुमनाम भएकी छन् ।

यसपटक पराजित भएकी उनी अब झन् गुमनाम हुने सम्भावना छ । क्षमता भएपनि उनले आफ्नो बढ्दो क्रेजलाई ध्यान नदिँदा र आगामी बाटोलाई राम्रोसँग नियाल्न नसक्दा झन् गुमनाम बन्नुपर्ने अवस्थामा पुगेकी हुन् ।