काठमाडौँ : आइतबार भएको प्रतिनिधिसभा तथा प्रदेशसभाको निर्वाचनको मतपरणाम आउने क्रम जारी छ । प्रतिनिधिसभा अन्तर्गत हालसम्म एमालेका ४० जना उम्मेदवारहरुले मतगणनामा अग्रता कायम गरेका छन् । पछिल्लो परिणामअनुसार निर्वाचनमा हालसम्म नेकपा एमालेका ५ जना उम्मेदवार विजयी भएका छन् ।

गुल्मीको २ मा एमालेका उम्मेदवार गोकर्ण विष्ट विजयी भएका छन् । उनले नेकपा एकीकृत समाजवादीकी नेतृ रामकुमारी झाँक्रीलाई पराजित गरेका छन् । विष्टले २८ हजार ४ सय ७६ मत प्राप्त गर्दा झाँक्रीले २६ हजार ४ सय ४२ मत ल्याइन् । त्यस्तै, ताप्लेजुङमा पनि एमालेका योगेशकुमार भट्टराई विजयी भएका छन् । उनले २१ हजार ९ सय ४३ मत प्राप्त गरेका छन् भने उनका निकटतम प्रतिद्वन्द्वी नेकपा माओवादी केन्द्रका खेलप्रसाद बुढाक्षेत्रीले २१ हजार ७ सय ३५ मत ल्याएका छन् ।

यता, ललितपुर २ मा पनि एमालेकै प्रेमबहादुर महर्जनले पनि जित हासिल गरेका छन् । उनले १९ हजार ८ सय ३४ मत ल्याउँदा उनका निकटतम प्रतिद्वन्द्वी हाम्रो नेपाली पार्टीका सुदिन शाक्यले केबल १० हजार ४ सय ४० मत ल्याए । ललितपुरको छिमेकी जिल्ला काठमाडौँ ९ मा एमालेले जित हासिल गरेको छ । त्यहाँ एमालेका कृष्णगोपाल श्रेष्ठले राष्ट्रिय स्वतन्त्र पार्टीका टेकबहादुर पोखरेललाई पराजित गरेका हुन् । श्रेष्ठले ११ हजार ९ सय ५६ मत ल्याउँदा पोखरेलले केबल १० हजार ९ सय ६१ मत ल्याए ।

प्रदेश नं. १ को उदयपुर २ मा पनि एमालेले जित हासिल गरेको छ । त्यहाँ नेकपा एकीकृत समाजवादीका जगन्नाथ खतिवडालाई पराजित गर्दै एमालेका अम्बरबहादुर रायमाझीले जित निकालेका हुन् । रायमाझीले १५ हजार २ सय ५१ मत प्राप्त गर्दा खतिवडाले १२ हजार ८ सय ९३ मत मात्र प्राप्त गरे ।