मुम्बई – फिल्म स्टार्सलाई फ्यानको ठूलो महत्त्व हुन्छ तर कहिलेकाहीँ तिनै फ्यानले समस्यामा पनि पार्ने गर्छन् । क्याटरीना कैफका लागि पनि यस्तै भएको छ । एक सन्काहा फ्यान सेल्फी लिनका लागि क्याटरीनाको पछि नै लागेका छन् ।

अहिले उक्त भिडियो सामाजिक सञ्जालमा भाइरल भइरहेको छ ।

सामाजिक सञ्जालमा एक प्रयोगकर्ताबाट अर्को प्रयोगकर्तासम्म पुगेको भिडियोमा क्याटरीना आफ्ना बडीगार्डका साथ कतै जाँदै गरेको देखिन्छ । क्याटरीना अगाडि गइरहेका बेला एक जिद्दी फ्यानले उनीसँग बारम्बार सेल्फी खिच्न आग्रह गर्छन् । ती फ्यानलाई क्याटरीनाका बडीगार्डले धकेल्छन् ।

पछि स्थिति बिग्रने देखेपछि क्टाटरीना एकछिन रोकिन्छिन् र फ्यानलाई केही टाढाबाट सेल्फी लिन आग्रह गर्छिन् । उनले आफ्ना बडीगार्डलाई पनि ती फ्यानलाई नभगाउन भन्छिन् ।

उक्त भिडियो हेरेर फ्यानले क्याटरीनाको तारिफ गरिरहेका छन् । उक्त स्थितिलाई क्याटरीनाले जसरी सम्हालिन्, त्यसलाई उनले तारिफयोग्य काम गरेको भन्दै उनको चर्चा भएको छ ।