काठमाडौं– कैलालीको जोशीपुर गाउँपालिका–१ स्थित राष्ट्रिय माध्यमिक विद्यालय (लकडमण्डी) मा विद्यालय व्यवस्थापन समितिका अध्यक्ष तथा प्राधानाध्यापकको मिलेमतोमा २ लाख ५९ हजार रुपैयाँ बराबरको अनियमितता भएको भेटिएको छ ।

अख्तियार दुरुपयोग अनुसन्धान आयोगले गरेको छानबिनका क्रममा राष्ट्रिय माविका पूर्व प्रधानाध्यापक लाल कुमार झा तथा पवन कुमार महतो र विद्यालय व्यवस्थापन समितिका अध्यक्ष गेहु प्रसाद डगौराको मिलेमतोमा अनियमितता भएको पाइएको हो ।

अख्तियारका अनुसार आर्थिक वर्ष २०६६/०६७, २०६९/०७० र २०७०/७१ मा विद्यालयको विभिन्न शीर्षकमा निकासा भएको रकममा अनियमितता भएको भेटिएको हो ।

पूर्व प्रधानाध्यापक झा र महतो तथा अध्यक्ष डगौरासमेत मिलेमतोमा निकासा भएको रकम प्राप्त गरी खर्चको लेखाजोखी नगरी अनियमितता भएको अख्तियारले जनाएको छ ।

अख्तियारले विद्यालयको रकममा अनियमितता गरेको भन्दै पूर्व प्रधानाध्यापक झाविरुद्ध २ लाख ५९ हजार ४ सय ८२ रुपैयाँ ७३ पैसा, अध्यक्ष डगौराविरुद्ध २ लाख १० हजार २ सय ५२ रुपैयाँ ७३ पैसा र भूतपूर्व प्रधानाध्यापक महतोविरुद्ध ६३ हजार रुपैयाँ बिगो तथा जरिवाना मागदावी गर्दै सोमबार विशेष अदालतमा भ्रष्टाचार मुद्दा दायर गरेको छ ।