काठमाडौं– मुद्दा मिलाइदिने भन्दै सेवाग्राहीसँग घुस लिने उच्च अदालत तुलसीपुरको नेपालगञ्ज इजलाशका टाइपिस्ट (नायव सुब्बा) कृष्ण कुमार पाठक र उनका छोरा आदित्य कुमार पाठकविरुद्ध भ्रष्टाचार मुद्दा दर्ता भएको छ ।

अदालतमा विचाराधीन अवस्थामा रहेको मुद्दा मिलाइदिने भन्दै नासु पाठकले सेवाग्राहीसँग ३ लाख रुपैयाँ घुस मागेको भन्दै अख्तियार दुरुपयोग अनुसन्धान आयोगमा उजुरी परेको थियो ।

सोही उजुरीका आधारमा अख्तियारले आफ्नै पैसा (३ लाख रुपैयाँ) दिएर सेवाग्राहीलाई पाठकसमक्ष पठाएको थियो । सेवाग्राहीले घुस वापतको रकम दिइसकेपछि पुगेको अख्तियारको टोलीले नासु पाठकलाई पक्राउ गर्‍यो । तर, घुस रकम फेला परेन ।

अख्तियारले गरेको छानबिनका क्रममा नासु पाठकले आफ्ना छोरा आदित्यलाई पैसा दिएर पठाएका खुलेको छ । आदित्य भने आफ्ना बुवाले बुझेको घुस रकम बुझेर फरार भएका छन् ।

सोही आधारमा अख्तियारले दुवै बाबु–छोराविरुद्ध ३ लाख रुपैयाँ बिगो तथा जरिवाना मागदावी गर्दै भ्रष्टाचार मुद्दा दायर गरेको छ ।

यस्तै, घुस प्रकरणमा सहयोग गरेको भन्दै उच्च अदालत तुल्सीपुरको नेपालगञ्ज इजलाशका कार्यालय सहयोगी गयादिन गडरियाविरुद्ध पनि अख्तियारले भ्रष्टाचार मुद्दा दायर गरेको छ । अख्तियारले गडरियाविरुद्ध १ लाख रुपैयाँ बिगो तथा जरिवाना मागदावी गरेको छ ।