स्टकहोम- स्विडेनमा निश्चित सार्वजनिक स्थानमा धूमपान गर्न प्रतिबन्ध लागेको छ । सोमबारबाट लागू भएको नयाँ नियमअनुसार खेलमैदान तथा रेल स्टेशनसहित सार्वजनिक स्थानमा अब धूमपान गर्न पाइने छैन ।

त्यस्तै, नयाँ नियमअनुसार रेष्टुरेन्टको बाहिरी क्षेत्रमा पनि धूमपान गर्न पाइने छैन । पछिल्लो नियममा परम्परागतसहित विद्युतीय चुरोट पनि समेटिएको छ ।

स्विडेनको १ करोड जनसङ्ख्यामध्ये ११ प्रतिशतले नियमित धूमपान गर्ने गरेको तथ्याङ्क छ । त्यस्तै, १० प्रतिशतले कहिलेकहीँ मात्र धूमपान गर्ने गर्छन् ।

स्विडेनले पहिलोपटक सन् २००५ मा बार र रेष्टुरेन्टमा धूमपानमा प्रतिबन्ध लगाएको थियो । स्विडेनले सन् २०२५ सम्म मुलुकलाई धूमपानमुक्त बनाउने उद्देश्यका साथ नयाँ नियम लागू गरेको अन्तर्राष्ट्रिय सञ्चारमाध्यमले जनाएका छन् ।