काठमाडौं – आईसीसी एकदिवसीय विश्वकप क्रिकेटमा आज (सोमबार) क्यारेबियन टोली वेष्ट इन्डिज र एसियाली टोली श्रीलंकाले प्रतिस्पर्धा गर्दैछन् ।

दी रिभरसाइड दुर्हाम क्रिकेट मैदानमा हुने खेलमा श्रीलंका आफ्नो नकआउट चरणको यात्रा कायम राख्ने लक्ष्यमा रहेको छ । यस्तै, क्यारेबियन टोली भने विश्वकमा आफ्नो सुखद् अन्त्यको खोजिमा रहने छ ।

श्रीलंकाका लागि नकआउट चरणको झिनो सम्भावना कायमै छ । जसमा ७ खेलबाट ६ अंक बनाएको श्रीलंकाले अबका दुईवटै खेलमा लगातार जीत निकाल्दै राम्रो रन रेटका आधारमा शीर्ष चौथोमा त पुर्नु पर्छ नै त्यति गर्दा पनि समान ८ खेलबाट १० र ९ अंक जोडेका क्रमश : इंग्ल्याण्ड र पाकिस्तानले विश्वकपमा आफ्नो अन्तिम खेलमा हार व्येहोरेको खण्डमा मात्रै श्रीलंका नकआउट चरणमा पुग्नेछ ।

आजको खेलमा श्रीलंका नतिजा आफ्नो पक्षमा पार्ने योजनामा रहेको छ । श्रीलंकाको पछिल्लो ५ खेलको नतिजा हेर्ने हो भने १ खेलमा जीत २ खेल बर्षाले प्रभावीत र १ खेलमा हार व्येहोरेको छ ।

यस्तै, वेष्ट इन्डिजको पछिल्लो ५ एकदिवसीय खेलमा ४ खेलमा हार र एक खेल वर्षाका कारण प्रभावीत भएको छ । आजको खेलमा वेष्ट इन्डिज श्रीलंकालाई रोक्दै आफुलाई अंक तालिकामा सुधार गर्ने योजनामा रहेको छ ।

यद्यपी वेष्ट इन्डिज जारी विश्वकपबाट बाहिरि सकेको छ । पुछारबाट दोस्रो स्थानमा रहेको इन्डिज टोलीले ७ खेलबाट मात्रै ३ अंक जोडेको छ ।