काठमाडौँ– नेपालसँग सीमा जोडिएको दक्षिणी चीनको स्वशासित क्षेत्र तिब्बतमा कोभिड १९ सम्बन्धी बन्देजको विरोधमा विशाल प्रदर्शन भएको छ । तिब्बतको राजधानी ल्हासामा चिनियाँ प्रशासनले लागू गरेको कोभिड १९ सम्बन्धी कठोर बन्देजको विरोधमा प्रदर्शन गरिएको भिडियो सामाजिक सञ्जालमा सार्वजनिक गरिएको हो ।

भिडियोमा प्रदर्शनकारी र प्रहरीबीच झडप भएको समेत देख्न सकिने बीबीसीले जनाएको छ । अधिकांश प्रदर्शनकारी तिब्बतमा आप्रवासी मजदुरको रुपमा कार्यरत हान जातिका चिनियाँहरु रहेको जनाइएको छ ।

कोभिड १९ को संक्रमण बढेसँगै ल्हासामा तीन महिनायता लकडाउनमा छ । बुधबार दिउँसो उक्त प्रदर्शन सुरु भई अबेर रातिसम्म जारी रहेको समाचारमा जनाइएको छ ।

भिडियोमा सयौँ प्रदर्शनकारीहरु सडकमा भेला भएको देखिन्छ भने सुरक्षा अधिकारीहरुले लाउडस्पिकरमार्फत् प्रदर्शनकारीलाई शान्त रहन आग्रह गरिरहेको सुन्न सकिन्छ । ‘कृपया बुझिदिनुहोस् र फर्केर जानुहोस् ।’ लाउडस्पिकरमार्फत् अधिकारीहरुले प्रदर्शनकारीलाई आग्रह गरिरहेको भिडियोमा सुन्न सकिन्छ ।

प्रदर्शनका भिडियो चिनियाँ सामाजिक सञ्जालबाट हटाइएपछि ती भिडियोहरु ट्विटरमा अपलोड गरिएका छन् । तिब्बतमा यस्ता प्रदर्शन निकै दुर्लभ मानिन्छन् ।