काठमाडौं– सिसडोल व्यवस्थापन संघर्ष समितिले विभिन्न माग राख्दै फोहोर उठाउन रोकेपछि करिव एक सातादेखि थुप्रिएको काठमाडौंको फोहोर आइतबारबाट उठ्ने भएको छ ।

संघर्ष समिति र काठमाडौं महानगरपालिकाबीचको वार्ता सकारात्मक भएसँगै फोहोर उठ्ने भएको हो । वार्ता टोलीले समस्या पहिचान गर्न र समाधानको उपायका  लागि १३ सदस्यीय टोली गठन गरी आवश्यक पहल गर्ने भएको छ ।

काठमाडौं महानगरपालिकामा मेयर विद्यासुन्दर शाक्यले काठमाडौंको फोहोर व्यवस्थापन चुनौतीको विषय भएको भन्दै आगामी दिनमा अब समस्या ननम्तिने दाबी गरे ।

उनली विगतमा भएका केही सहमतिहरु कार्यान्वयनमा कठिनाइ भए पनि अहिले संघर्ष समितिसँगको वार्ता सकारात्मक भएको र  स्थानीयले सहमति जनाएकाे बताउँदै  उनीहरुको माग सम्बोधन गर्न महानगर प्रतिवद्ध रहेको जनाए ।

उनले भने, ‘सिस्डोलबासीको समस्या हाम्रो पनि समस्या हो, यसमा हामी गम्भीर छौं ।’

स्थानीयले आफूहरुका माग पूरा गर्न १५ दिने अल्टिमेटम दिएका छन् । आजबाट फोहोर उठाउन दिइने भने पनि १५ दिनभित्र आफूहरुका माग पूरा नभए कुनै पनि कुरा नसुन्ने सिसडोल वासीले अडान राखेका छन् ।

संघर्ष समितिका अध्यक्ष चक्रमान बलामीले भने, ‘ वार्ता सकारात्मक भयो, महानगरले हाम्रा माग पूरा गर्ने आश्वासन दिएको छ, १५ दिन भित्र हाम्रा माग पूरा नभए हामी पुनः आन्दोलना उत्रिनेछौं । त्यो नै हाम्रो अन्तिम र निर्णायक आन्दोलन हुनेछ ।’

केही दिन अघि संघर्ष समितिले काठमाडौंमा कार्यक्रम गरी गत विहीबारबाटै फोहोर उठाउने कार्य बन्द गरेको जानकारी दिएको थियो । समितिले ओखरपौवा सिसडोलमा फोहोर खसाल्न रोकेको र सधैंको लागि बन्द गर्ने समेत चेतावनी दिएको थियो ।