एजेन्सी– भारतको राजधानी नयाँ दिल्लीमा रहेको एक होटेलमा आगलागी हुँदा कम्तीमा १७ जनाको ज्यान गएको छ । दिल्लीको कारोलबाख क्षेत्रमा रहेको अरपित प्यालेस होटेलमा आगलागी भएको हो ।

घटनामा अरु ३४ जनाको उद्धार गरिएको स्थानीय अधिकारीले जनाएका छन् । आगलागीबाट ज्यान गुमाउनेमा एक जना बालक समेत रहेको बताइएको छ ।आगलागीका समयमा त्यहाँ म्यान्मारका पर्यटहरु पनि रहेकाले मारिनेमा उनीहरु पनि परेको हुनसक्ने भारतीय सञ्चारमाध्यमले जनाएका छन् ।

अधिकांश धुवाँले सास फेर्न समस्या परेकाले निस्सासिएर मारिएको जनाइएको छ । यद्यपि एकजना महिला र बालक भने आगलागीबाट बच्न होटेलको पाचौँ तल्लाबाट हामफाल्दा उनीहरुको ज्यान गएको बताइएको छ । मंगलबार सबेरै अधिकांश पाहुनाहरु सुतिरहेका बेला आगलागी भएकाले ठूलो मानवीय क्षति भएको हो ।

होटेल तथा अन्य भवनमा सामान्य सुरक्षा व्यवस्था पनि नहुने भएकाले भारतमा यस्ता दुर्घटनाबाट हरेक वर्ष सयौँ मानिसहरुको ज्यान जाने गर्छ ।