काठमाडौँ- नेपाली नागरिकतासहति एकजना चिनियाँ महिलालाई भारतीय प्रहरीले दिल्लीमा पक्राउ गरेको छ।  चीनको हाइनान प्रान्तकी ती महिलाले नेपाली नागरिकतामा डोल्मा लामा नाम राखेर शंकास्पद गतिविधि गरेको अभियोगमा शुक्रबार दिल्ली प्रहरीले पक्राउ गरेको हो ।

टाइम्स अफ इन्डियाका अनुसार दिल्ली प्रहरीले उनलाई जासुसीको आरोपमा पक्राउ गरेर म्याद थपका लागि स्थानीय अदालतमा पेश गरेको छ । काई रुओ चिनियाँ नाम भएकी उनलाई दिल्लीस्थित मञ्जुका तिला क्षेत्रबाट पक्राउ गरेर अनुसन्धान थालिएको हो । उनले दिल्लीस्थित शरणार्थी शिविरमा बसेर त्यहाँका विभिन्न मन्त्रालय र सरकारी कार्यालयबाट गोप्य विवरण संकलन गर्ने कार्यमा संलग्न रहेको प्रहरीको भनाइ छ ।

बौद्ध भिक्षुको रुपमा दिल्लीमा बस्दै आएकी उनीबाट कयौँ शंकास्पद दस्तावेज समेत भेटिएको पनि दिल्ली प्रहरीले जानकारी दिएको छ । उनी सन् २०१९ मा चीनबाट चिनियाँ नागरिककै रुपमा जहाजबाट दिल्ली आएको प्रहरीले जनाएको छ । तर त्यसपछि उनले नेपाली नागरिकता लिएर डोल्मा लामाका रुपमा आफूलाई चिनाउँदै आएको प्रहरीको दाबी छ । 

ती चिनियाँ महिलामाथि आफ्नो हुलिया र परिचय फे‍रेर भारतविरोधी गतिविधिमा संलग्न भएको आरोप लगाइएको छ । भारतीय चर्चित पत्रिका टाइम्स अफ इन्डियाको अनलाइन संस्करणले उनी नेपालको नागरिकका रुपमा भारतमा रहँदै आएको उल्लेख गरेको छ । 

उनलाई अनुसन्धानका लागि १४ दिन प्रहरी हिरासतमा पठाइएको छ ।