काठमाडौँ – यमपञ्चकको पहिलो दिन काग तिहारका दिन काठमाडौँको रत्नपार्कस्थित शान्तिवाटिकामा १९औँ ‘काग सम्मेलन’हुने भएको छ।

ग्रिन सिटी अस्पताल वसुन्धराको आयोजनामा भोलि (कात्तिक ६ गते) सोमबार बिहान ६ देखि ७ बजेसम्म काग सम्मेलन हुन लागेको हो। सम्मेलनमा एक सय ७३ जीव जनावर तथा चराचुरुङ्गीको आवाज निकाल्ने इलामका रमेश दुलाल ‘कागे’ले कागको स्वर निकालेर कागलाई एकै ठाउँमा भेला पारी सम्मेलन गर्ने कार्यक्रम रहेको छ। दुलालले काग सम्मेलनमा चार सय कागलाई एकै ठाउँमा जम्मा पार्ने बताएका छन्।

विगत १८ वर्षदेखि दुलालले काग तिहारका अवसरमा काग सम्मेलन गर्दै आएका छन्। ‘कागसँग उसको भाषा बुझेर बोल्नुपर्छ, कागलाई बोलाउँदा मलाई आपत् पर्‍यो भन्दै सहयोग माग्नुपर्छ अनि काग आफूतिर आउँछन्’, उनले भने।

काग तिहारको दिनमा कागलाई मीठा खानेकुरा दिने चलन छ। कागलाई यमदूतका रूपमा मान्ने शास्त्रीय परम्परा रहेको छ।