काठमाडौँ- नेकपा एमालेका अध्यक्ष एवम् पूर्वप्रधानमन्त्री केपी शर्मा ओलीले नेपाली कांग्रेसका सभापति एवम् प्रधानमन्त्री शेरबहादुर देउवालाई बहसका लागि आमन्त्रण गरेको विषयलाई आम सञ्चार माध्यमहरुले सकारात्मक रुपमा लिएको भन्दै खुशी व्यक्त गरेका छन् ।

आज सामाजिक सञ्जाल फेसबुकमा पोस्ट गर्दै अध्यक्ष ओलीले यसबारे सञ्चार माध्यम र सम्पादकहरुको ध्यानाकर्षण गराएको उल्लेख गरेका छन् ।

फेसबुकमा उनले लेखेका छन्, ‘’मैले हिजो एजेण्डा आधारित बहसका लागि नेकांका सभापति तथा प्रधानमन्त्री शेरबहादुर देउवाजीलाई आमन्त्रण गरेको थिएँ । यस विषयलाई आम सञ्चार माध्यमहरुले पनि सकारात्मक चर्चा गरेको पाएँ । यसप्रति म खुसी छु ।’’

विकसित देशहरूमा निर्वाचनको समयमा यस्ता लाईभ डिबेटहरु सार्वजनिक सञ्चार माध्यमबाट आयोजना गर्ने गरिने बताउँदै ओलीले यसबारे सञ्चार माध्यम र सम्पादकहरुको राय पनि माग गरेका छन् ।

‘‘विकसित देशहरूमा निर्वाचनको समयमा यस्ता लाईभ डिबेटहरु सार्वजनिक सञ्चार माध्यमबाट आयोजना गर्ने गरिन्छ । यहाँका सञ्चार माध्यम र सम्पादकज्यूहरुले यस विषयमा के सोच्नु भएको छ, समग्र सञ्चार जगतको ध्यानाकर्षण गर्न चाहन्छु ।’’ उनको पोस्टमा भनिएको छ ।