काठमाडौँ– तालिबानको शासनकालमा महिलाहरुको अवस्था अझ नाजुक बन्दै गएको संयुक्त राष्ट्रसंघका लागि अफगान स्थायी नियोगका प्रमुखले जनाएका छन् ।

राष्ट्रसंघ सुरक्षा परिषद्मा बोल्दै अफगान प्रतिनिधि नसिर अहमद फैकले तालिबानले महिलाहरुलाई नैसर्गिक अधिकार एवम् स्वतन्त्रता हनन् गरेको भन्दै महिलाहरुको अवस्था अझ नाजुक बन्दै गएको जनाएका हुन् ।

अफगानिस्तानबाट प्रकाशित हुने खामा प्रेसका अनुसार फैकले तालिबानले महिला एवम् बालिकाहरुलाई सबै किसिमका सामाजिक, आर्थिक एवम् राजनीतिक सहभागिताबाट संस्थागत रुपमा नै बञ्चित गरेको समेत बताए ।

उनले महिला एवम् बालिकाहरुको आधारभूत अधिकार पुनस्थापना गर्नुपर्नेमा जोड दिँदै तत्काल महिलाका लागि विद्यालय खोल्न समेत तालिबानसमक्ष माग गरेको जनाइएको छ ।