सिओल– अमेरिकी राष्ट्रपति डोनाल्ड ट्रम्प दक्षिण कोरिया भ्रमणमा निस्केका छन् । जापानको ओसाका शहरमा भएको जी २० को सम्मेलन सकेर राष्ट्रपति ट्रम्प शनिबार दक्षिण कोरिया पुगेका हुन् ।

दक्षिण कोरिया जानुअघि राष्ट्रपति ट्रम्पले उत्तर कोरियाली सर्वोच्च नेता किम जोङ उनलाई दुई कोरियाबीचको सीमाक्षेत्रमा भेटको प्रस्ताव गरेका थिए ।

उत्तर कोरियाली उप विदेशमन्त्री चोई सोन हुईले दुई नेताबीच कोरियाली सीमाक्षेत्रमा हुनसक्ने भेटवार्ता अर्थपूर्ण हुने टिप्पणी गरेपनि उत्तर कोरियाले भेटवार्ताको प्रस्तावबारे केही टिप्पणी गरिसकेको छैन ।

यद्यपि कोरियाली श्रोतलाई उद्धृत गर्दै अन्तर्राष्ट्रिय सञ्चारमाध्यमले दुई नेताबीच आइतबार कोरियाली सीमाक्षेत्रमा भेटवार्ता हुनसक्ने सम्भावना रहेको जनाएका छन् । यसअघि जी२० सम्मेनलनकै क्रममा अमेरिकी राष्ट्रपति ट्रम्पले उत्तर कोरियाली भूमिमा पाइला राख्ने चाहना व्यक्त गरिसकेका छन् । भेटवार्ता भएमा दुई नेताबीच भएको यो तेश्रो भेटवार्ता हुनेछ । यसअघि सिङ्गापुर र भियतनाममा दुई नेताले शिखर वार्ता गरिसकेका छन् ।

भियतामको हनोईमा गत फेब्रुअरी महिनामा भएको शिखर वार्ता बिना निष्कर्ष सकिएपछि कोरियाली प्रायद्विपमा आणविक निशस्त्रीकरण तथा शान्ति प्रक्रिया अन्यौलमा रहँदै आएको छ । दुई नेताबीच भेटवार्ता भएमा अमेरिका र उत्तर कोरियाबीचको सम्बन्ध केही हदसम्म सुदृढ हुने विश्वास गरिएको छ ।