मुम्बई – बलिउड अभिनेता सैफ अली खान र अमृता सिंहकी छोरी सारा अली खानको पहिलो फिल्म ‘केदारनाथ’ ले नै सारालाई चर्चित बनायो । दोस्रो फिल्म ‘सिम्बा’ ले पनि साराको करिअरलाई फाइदा पु–यायो । दुवै फिल्म बक्स अफिसमा हिट बने ।

पछिल्लो समय चर्चामा रहिरहने अभिनेत्रीमा सारा अली खान पनि पर्छिन् ।

सारा कम समयमा बलिउडकी उत्कृष्ट अभिनेत्रीमा आउनेमध्ये एक हुन् । सारा आफ्नो लूकका कारण पनि चर्चामा आउने गर्छिन् । सामाजिक सञ्जालमा अपलोड गरेका तस्वीरले पनि साराको चर्चा भइरहन्छन् ।

हालै साराले बताएकी छिन् कि, आफूले फिल्म साइन गर्ने बेलामा आफ्नो भूमिकामा के चाहन्छिन् ।

‘म आफ्नो करिअरलाई नयाँ च्याप्टरका हिसाबले देख्छु, मेरा लागि अभिनयले मुख्य महत्त्व राख्छ,’ साराले भनिन्, ‘मलाई लाग्छ, राम्रो काम गर्न आफूलाई पनि त्यहीअनुसार ब्यालेन्समा राख्न जरुरी छ ।’

उनले स्किृप्टमा सबैभन्दा पहिले विश्वास हुनुपर्ने धारणा राखिन् । चाहे जुनसकुै फिल्ममा आफ्नो भूमिका होस् तर निर्देशक र स्किृप्टमा विश्वास हुन जरुरी भएको उनले बताइन् ।

सारा पछिल्लो समय इम्तियाज अलीको निर्देशनमा बनिरहेको फिल्म ‘लभ आजकाल २’ मा व्यस्त छिन् । उनी यो फिल्ममा कार्तिक आर्यनका साथ देखिनेछिन् । वास्तविक जीवनमा पनि उनको नाम कार्तिक आर्यनसँगै जोडिएर आउने गर्छ ।