काठमाडौँ- अफगानिस्तानमा महिलाहरुका लागि विद्यालय खुला गर्नुपर्ने आवाज अझ सशक्त बन्न थालेको छ ।

महिला विद्यार्थीका लागि विद्यालय बन्द गरेसँगै अफगानिस्तानमा शासन गरिरहेको तालिबानको चौतर्फी आलोचना भइरहेको छ । यस्तो अवस्थामा अफगानिस्तानको टोलो न्यूजले सञ्चालन गरेको अनलाइन सर्वेक्षणमा झण्डै ९० प्रतिशत मतदाताले अफगानिस्तानमा महिला विद्यार्थीका लागि पनि विद्यालय खुला गर्नुपर्ने पक्षमा मतदान गरेका छन् ।

टोलो न्यूजको अनलाइन संस्करणले जनाएअनुसार उक्त टेलिभिजनको फेसबुक र इन्स्टाग्राम पेजमा २४ घण्टाका लागि अनलाइन सर्वेक्षण गरिएको थियो ।

फेसबुकमा सञ्चालित सर्वेक्षणमा ३४ हजार १ सय जनाले मतदान गरेको र यीमध्ये ८९ दशमलब ७ प्रतिशतले महिला विद्यालय खुला हुनुपर्ने पक्षमा मतदान गरेको उक्त टेलिभिजनले जनाएको छ ।

फेसबुकमा मतदान गर्ने १० दशमलब ३ प्रतिशतले महिला विद्यालय खुला हुनुपर्ने विषयको विपक्षमा मतदान गरेका थिए ।

त्यसैगरी इन्स्टाग्रामको सर्वेक्षणमा ९ हजार ८ सय २० जनाले सहभागिता जनाएको टोलो न्यूजले जनाएको छ । यीमध्ये ९२ प्रतिशतले महिलाका लागि विद्यालय खुला हुनुपर्ने पक्षमा मतदान गरेका थिए । ५ प्रतिशतले विपक्षमा र ३ प्रतिशतले थाहा छैन भन्ने विकल्पमा मतदान गरेको जनाइएको छ ।

यसअघि तालिबानको नेतृत्वमा रहेको शिक्षा मन्त्रालयले साँस्कृतिक कारणले गर्दा महिला विद्यार्थीका लागि विद्यालय बन्द गरिएको जनाएको थियो ।

तालिबानले बारम्बार आफूहरु महिला शिक्षाको विपक्षमा नभएको बताउँदै आएपनि महिलाका लागि विद्यालय कहिले खुल्छन् भन्ने अझै अन्यौल रहेको टोलो न्यूजले जनाएको छ ।