जलेश्वर– शुक्रबार बिहान परेको मुसलधारे पानीका कारण महोत्तरीको जलेश्वर कारागार डुवानमा परेको छ ।

विहान ५ बजेदेखि करिब ७ बजेसम्म परेको मुसलधारे पानीका कारण जलेश्वर कारागार डुवानमा परेको हो । महोत्तरी, धनुषा र केही वर्षदेखि सर्लाही जिल्लासमेतको संयुक्त कारागारका रुपमा रहेको जलेश्वर कारागार डुवानमा परेपछि कैदीबन्दी समस्यामा परेका छन् ।

झण्डै १६० वर्ष पुरानो राणाकालीन समयमा निर्माण भएको जलेश्वर कारागार वरपर सामान्य वर्षातमा समेत पानी जम्ने गर्छ । जलेश्वर नगरपालिकाको सबैभन्दा गहिरो स्थानमा रहेका कारण कारगार वर्षातको समयमा डुवानमा पर्ने गरेको निमित्त जेलर प्रदीपकुमार साहले बताए ।

मुसलधारे वर्षाका कारण कारागारको बाहिर मूलद्वारदेखि भित्र कैदीबन्दी प्रवेश गर्ने मूल ढोकासम्म पानी जम्मा भएको छ ।

कारागारभित्र कैदीबन्दी बस्ने बन्दीगृहबाट पानी निकासका लागि बनाइएको नाला भएर पनि बाहिरको पानी भित्र प्रवेश गरेर पूरै कारागार जलमग्न र अस्तव्यस्त भएको चौकीदार श्यामसुन्दर यादवले बताए ।

उनका अनुसार वर्षा र बाहिरी नालाबाट आएको पानीले गर्दा भित्रका कैदीबन्दीलाई खाना पकाउन, खान, बस्न, सुत्न, शौचालय जान समस्या भएको छ ।

जलेश्वर कारागारमा हाल ४१९ जना पुरुष, ४१ जना महिला र ३ जना आश्रित बालबालिका गरी जम्मा ४६३ जना कैदीबन्दी रहेका छन् ।

त्यस्तै कारागार सुरक्षाका लागि खटिएका सशस्त्र प्रहरी र नेपाल प्रहरी बस्ने ब्यारेक समेत पानीले प्रभावित बनेको छ ।