काठमाडौँ– नेकपा एकीकृत समाजवादी निकट विद्यार्थी संगठन अनेरास्ववियुले विद्यार्थीहरूलाई स्वास्थ्य संस्थाको ओपीडी सेवामा ५० प्रतिशत छुट दिने निर्णय भएको जानकारी दिएको छ । 

सोमबार काठमाडौंमा पत्रकार सम्मेलन गर्दै अनेरास्ववियुले आफूहरूको पटक पटकको दबाब र ध्यानाकर्षणपछि स्वास्थ्य तथा जनसंख्या मन्त्रालयसँग विद्यार्थीहरूलाई परिचय पत्रका आधारमा ओपीडी सेवामा ५० प्रतिशत छुट दिने सहमतिसहित निर्णय भएको जानकारी दिएको हो ।

अनेरास्ववियुको पहलकदमी र सङ्घर्षले केही महत्वपूर्ण उपलब्धि प्राप्त गरेको अनेरास्ववियुका अध्यक्ष सुदेश पराजुलीले बताए । असोज ९ गते स्वास्थ्य मन्त्रालयको मन्त्रीस्तरीय निर्णय अनुसार सरकारी अस्पतालको ओ.पि.डी सेवामा विद्यार्थी परिचय पत्रको आधारमा ५० प्रतिशत छुटको व्यवस्था लागू हुने निर्णय भएको उनले बताए ।

पराजुलीले नेपाली विद्यार्थी आन्दोलन माथि विभिन्न खालका प्रश्नहरू उठी रहेको वेला आम विद्यार्थी समुदायको पक्षमा भएको यो निर्णयले विद्यार्थी आन्दोलनको औचित्य पुर्न : पुष्टि भएको जिकिर गरे ।