काठमाडौं – आईसीसी एकदिवसिय वरियतामा नेपाली राष्ट्रिय क्रिकेट टोली एक स्थान तल झरेको छ ।

बिहीबार सार्वजनिक एकदिवसिय वरियतामा नेपाल १५ औं स्थानमा रहेको छ । नेपालले १९ रेटिङ पाउँदा १सय ५२ अंक पाएको छ । यस्तै, अघिल्लो वरियतामा १४ औं स्थानमा रहेको नेपाल पछिल्लो समय खेल खेल्न नपाउँदा एक स्थान खस्किएको हो ।

नेपालले यसअघि जनवरी अन्तिमतिर युनाइटेड अबर इमिरेट्स (युएई) सँग तीन एकदिवसिय खेलको शृङ्खला खेल्दा २–१ जित हात पारेको थियो भने त्यसयता कुनै पनि अन्तर्राष्ट्रिय एकदिवसिय खेलेको छैन । तर, पनि अन्य टोलीहरुको प्रदर्शनका आधारमा नेपालको पनि तल माथि भएको हो ।

इंग्ल्यान्डमा जारी १२ औं संस्करणको आईसीसी एकदिवसीय विश्वकपमा उत्कृष्ट प्रदर्शन गरिरहेको भारत एकदिवसिय वरियताको शीर्ष स्थानमा उक्लिएको छ । भारत यसअघि दोस्रो स्थानमा थियो । त्यस्तै, दोस्रो स्थानमा इंग्ल्यान्ड र तेस्रो स्थानमा न्युजिल्याण्ड छ । यस्तै, टि–२० वरियतामा भने नेपाल ११ औं स्थानमा यथावत रहेको छ ।