मुम्बई – शाहिद कपूर स्टारर फिल्म ‘कबीर सिंह’ ले जस्तो सफलता पाइरहेको छ, त्यो सफलता शाहिद कपूरले यसअघि अनुभव गर्न पाएका थिएनन् । शाहिदले लामो समय फिल्म क्षेत्रमा काम गरे । तर, कमै फिल्मले मात्र उनलाई चिनायो । भलै शाहिदलाई राम्रो अभिनय गर्ने अभिनेता पनि भन्ने गरिन्छ ।

राम्रो फिल्म दिएर पनि सफलता खासै हात नपारेका शाहिदलाई ‘कबीर सिंह’ ले भने गज्जबको प्रतिक्रिया दिएको छ । फिल्मले बक्स अफिसमा २ सय करोड सजिलै कमाउने अनुमान गरिएको छ । यहाँसम्म कि, शाहिदको फिल्ममध्ये ‘कबीर सिंह’ करोड क्लबमा पुग्ने पहिलो फिल्म बन्न पुगेको छ । २८ फिल्मपछि शाहिदले यो सफलताको स्वाद चाखेका हुन् ।

यो सफलताका लागि शाहिदले झण्डै १६ वर्ष कुर्नुपर्‍यो ।

शाहिद कपूरले ‘इश्क–विश्क’ बाट बलिउडमा कदम राखेका थिए । यो फिल्म सन् २००३ मा रिलिज भएको थियो । ‘कबीर सिंह’ लाई शाहिद कपूरको डुब्दै गरेको करिअरमा इट्टा थपेको एक फिल्मका रुपमा हेरिएको छ । यो फिल्मपछि शाहिदका फ्यान फलोइङ झनै थपिएका छन् ।