काठमाडौँ– नेकपा माओवादी केन्द्रका अध्यक्ष पुष्पकमल दाहाल प्रचण्डले भ्रष्टाचार गर्दिनँ भनेर भित्रभित्रै भ्रष्टाचार गर्ने प्रवृत्तिलाई अन्त्य गर्नुपर्ने बताएका छन् ।

बिहीबार काठमाडौंमा नेपाल उद्योग व्यापार महासंघको प्रथम केन्द्रीय महाधिवेशनलाई सम्बोधन गर्दै प्रचण्डले भ्रष्टाचार गर्दिनँ, गर्न पनि दिन्न भन्ने साइनबोर्ड राखेर भित्र भ्रष्टाचारबाहेक केही पनि नगर्ने व्यक्तिहरू मुलुक सञ्चालनमा रहेको भन्दै यस्तो प्रवृत्तिलाई अन्त्य गर्नुपर्ने बताएका हुन् । उनले मुलुकबाट भ्रष्टाचार अन्त्य गर्नका लागि निर्वाचन प्रणाली र शासकीय स्वरूपमा परिवर्तन गर्नुपर्ने स्पष्ट पारे ।

उनले अव मुलुकमा संरचनागत सुधार गरेर आर्थिक सुधारमा जानुपर्ने धारणा पनि राखे । देशलाई आत्मनिर्भरताको बाटोमा लान उद्योग व्यवसायीहरूको भूमिका महत्वपूर्ण रहेको भन्दै आर्थिक क्रान्तिका लागि आवश्यक परे व्यवसायीहरू सडकमा आउनुपर्ने उनले बताए ।

कार्यक्रममा व्यवसायी कृष्ण आचार्यले राजनीतिक परिवर्तनसँगै अव आर्थिक रूपान्तरणका लागि केन्द्रित हुनुपर्ने बेला आएको बताए । उनले निर्वाचनको घोषणा पत्रमा दलहरूले आर्थिक विषयलाई प्राथमिकताका साथ समेट्नुपर्ने बताए । 

कार्यक्रमका व्यवसायीहरूले निर्वाचनका जादा व्यवसायीहरूको मुद्दालाई प्राथमिकतामा साथ अघि बढाउन सुझाव दिएका थिए ।