लण्डन – गैरआवासीय नेपाली संघ (एनआरएनए) संस्थापक डा.उपेन्द्र महतोले देशको समृद्धिका लागि मिलेर अघि बढ्न विदेशमा बस्ने नेपालीलाई आग्रह गरेका छन्।

गैरआवासीय नेपाली संघको एनआरएनए एकेडेमीद्वारा आइतबार आयोजित आर्थिक पारदर्शिता र व्यवस्थापनसम्बन्धी एक भर्चुअल अन्तरक्रियालाई सम्बोधन गर्दै उनले देश समृद्ध नभएसम्म व्यक्तिगत सफलताको कुनै अर्थ नहुने बताए। उनले अहिले विश्वले पुँजीलाई भन्दा ज्ञान, सिप, परम्परा, संस्कार र अनुभवलाई महत्त्व दिन थालेको बताए।

डा. महतोले विदेशमा सङ्घर्ष गरेर केही हदसम्म नेपालीहरू स्थापित हुनसकेकोमा खुसी व्यक्त गर्दै विदेशमा सिकेको ज्ञान सिप र अनुभव आफ्नै देशमा लगाउन आग्रह गरे।

उनले नेपाललाई आर्थिक समृद्धि मात्र होइन बौद्धिक, धार्मिक, सांस्कृतिक रुपमा पनि समृद्धि बनाउन लाग्नु पर्नेमा जोड दिए। देशको समृद्धिको लागि काम गर्न चुनौतीपूर्ण भए पनि यसलाई अवसरको रुपमा लिनु पर्ने उनले बताए।

गैरआवासीय नेपाली संघका उपाध्यक्ष डा. हेमराज शर्माले संघको अभियानको स्थापना नै देशमा ज्ञान, सिप र अनुभवलाई देशमा भित्र्याउने उद्देश्यले भएको स्मरण गराए। उनले पनि नेपालको समृद्धिको लागि काम गर्न गम्भीर भएर लाग्न आग्रह गरे।