काठमाडौं – काठमाडौं उपत्यकालाई संयुक्त राष्ट्रसंघीय शैक्षिक वैज्ञानिक तथा साँस्कृतिक संगठन युनेस्कोमा विश्व सम्पदाको खतराको सूचीमा राख्ने प्रस्ताव गरिएको छ ।

आगााी ३० जुन देखि १० जुलाईसम्म अजरबैजानको राजधानी बाकुमा हुने युनेस्कोको ४३ औं सम्मेलनमा यसबारे छलफल हुनेछ ।

युनेस्कोले २०७२ साल बैशाख १२ को भूकम्पका कारण क्षतिग्रस्त भएको काठमाडौं उपत्यकाको साँस्कृतिक धरोहरको संरक्षणमा सन्तोषजनक प्रगति हुन नसकेका कारण उपत्यकालाई खतराको सूचीमा राख्नुपर्ने प्रस्ताव गरिएको हो ।

युनेस्कोको प्रस्ताव पारित भएमा उपत्यकाभित्रका विश्व सम्पदा सूचीमा सूचीकृत क्षेत्रको साँस्कृतिक पहिचान संकटमा पर्ने जनाइएको छ ।
युनेस्कोको विश्व सम्पदा सूचीमा काठमाडौं उपत्यकाका पशुपतिनाथ, बौद्धनाथ, स्वयम्भूनाथ, पाटन र भक्तपुर दरवार क्षेत्र र चाँगुनारायण मन्दिर सूचीकृत छन् ।

यसअघि पनि युनेस्कोले सम्पदाको संरक्षणमा ध्यान दिन नसकेको भन्दै खतराको सूचीमा सूचिकृत गर्ने चेतावनी दिँदै आएको छ ।