काठमाडौँ- आज २०७९ साल भदौ २२ गते बुधबार । सन् २०२२ को सेप्टेम्बर ७ तारिख । आजको दिन इतिहासमा भएका केही महत्त्वपूर्ण घटनाक्रम यस्ता छन् :

सन् २००४ सेप्टेम्बर ७ मा क्यारिबियन सागरमा अवस्थित ग्रेनाडा टापुमा आएको ‘इभान’ नामक तुफानले त्यहाँका ९० प्रतिशत भौतिक संरचनामा क्षति पुर्‍याउँदै ३९ जनाको ज्यान लिएको थियो ।

सन् १९७९ सेप्टेम्बर ७ मा संयुक्त राज्य अमेरिकामा मनोरञ्जन तथा खेलकुद प्रोग्रामिङ नेटवर्क इएसपीएनको सुरुवात भएको थियो ।

सन् १९७८ सेप्टेम्बर ७ मा बुल्गेरियाका प्रसिद्ध लेखक जोर्जी मार्कोभको हत्या भएको थियो । पिकाडिली नामक हत्याराले छाताको प्रयोग गर्दै राइसिन रसायन मार्कोभको खुट्टामा घोचेका थिए ।

सन् १९७८ सेप्टेम्बर ५ मा इङ्लिश ड्रमर, निर्माता र गीतकार किथ मुनको निधन भएको थियो ।  चिकित्सकले दिएको हेमिनेभिरिन औषधीको ओभरडोजका कारण उनको ३२ वर्षको उमेरमा निधन भएको थियो ।

सन् १९७७ सेप्टेम्बर ७ मा संयुक्त राज्य अमेरिका र पनामाका राष्ट्रप्रमुखले एक सन्धिमा हस्ताक्षर गर्दै पनामा नहरको सार्वभौम अधिकार पनामालाई फिर्ता गरेका थिए ।

सन् १९४० सेप्टेम्बर ७ मा तत्कालीन नाजी जर्मनीले संयुक्त अधिराज्य बेलायतमा रणनीतिक बम आक्रमण सुरु गरेका थिए । यसपश्चात् ५७ दिनसम्म लन्डनमा हवाई आक्रमणअन्तर्गत बम खसाइएको थियो । यसले २० हजार भन्दा बढी मानिसको ज्यान लिएको थियो ।

सन् १९३६ सेप्टेम्बर ७ मा दुर्लभ तास्मानियन बाघ विलुप्त भएको थियो । अष्ट्रेलियाको तास्मानिया टापुस्थित होबार्ट चिडियाखानामा रहेको विश्वको अन्तिम तास्मानियन बाघको मृत्यु भएको थियो ।